Гурван хэмжээст хэвлэлийн “шингэн” технологи ямар ч хэцүү биетийг дор нь хэвлэнэ

Сүүлийн жилүүдэд гурван хэмжээст хэвлэл үсрэнгүй хөгжиж байна. Хэдийгээр ихэнх гурван хэмжээст хэвлэгч хуванцраар эд зүйл шахаж хэвлэж байгаа ч металл, шил, хүнсний холимог, тэр бүү хэл амьд эдээр хүртэл хэвлэж байна. Хэдийгээр ингэж олон янзаар хэвлэж байгаа ч материалаа нэг үе яваад хатуурсных нь дараа дээрээс нь дараагийн үеийг түрхэх зарчмаар хэвлэдэг. Энэ нь сайн арга хэдий ч нэг том сул тал нь өчүүхэн төдий зүйл хэвлэхэд ч маш их хугацаа шаарддаг. Хэдхэн сантиметр өндөртэй гурван хэмжээст зүйл хэвлэхэд хэд хэдэн цаг зарцуулдаг. Тэгвэл Умард Каролинагийн их сургуулийнэрдэмтэд гурван хэмжээст хэвлэлийн хэвлэх хугацааг хоёр дахин богиносгосон CLIP (continuous liquid interface production) хэмээх технологи боловсруулжээ. Энэ технологи нь үе үеэр давхарлах биш, харин тасралтгүй хөдөлгөөнөөр цутгадаг.
Гурван хэмжээст технологи нь зарим хуванцрын төрлийн материалыг хурдан хатууруулах үйлчилгээтэй хэт ягаан туяаг ашиглах нь элбэг. Гэтэл агаарт буй хүчилтөрөгч зарим материалын хатууралтыг саатуулах нь бий. Судлаачид энэ удаад уг бэрхшээлийг давуу тал болгож чадсанаар нэг цагт нэг метр зүйлийг гурван хэмжээсээр хэвлэдэг болжээ. Хэвлэлтийн хурдыг нэмснээр хэвлэж буй зүйлийн бодит хэмжээг илүү нарийсгах боломжтой болжээ. Өмнө нь бодит хэмжээний зөрүү 100 микрометр буюу хүний үсний бүдүүнээс бага байсан юм.